प्रतिनिधी Sunita Rasal :
सुपे : 🌱 घर तिथे अंगण, अंगण तिथे अजितदादांची आठवण — विद्यार्थ्यांच्या हाती केशर आंब्याची झाडे सुपे : पर्यावरण संवर्धनाची जाणीव विद्यार्थ्यांमध्ये रुजविण्याच्या उद्देशाने विद्या प्रतिष्ठान सुपे इंग्लिश मिडीयम स्कूल व राजपथ इन्फ्रा कॉन. प्रा. लि., पुणे यांच्या संयुक्त विद्यमाने ‘मा. अजितदादा पवार वृक्षसंवर्धन स्पर्धा २०२६-२७’ आयोजित करण्यात आली आहे. या उपक्रमांतर्गत बुधवार, दि. ३० सप्टेंबर २०२६ रोजी राजपथ इन्फ्रा कॉन. प्रा. लि., पुणे कंपनीच्या वतीने श्री. रोहिदास पिसाळ (प्रोजेक्ट डायरेक्टर), श्री. महेश देशमुख (मशिनरी हेड), श्री. ॲड. विपुल पाटील (उद्योजक ), श्री. रामभाऊ जगताप (प्रसिद्ध कलाकार), शाळेचे प्राचार्य डॉ. योगेश पाटील या मान्यवरांच्या हस्ते शाळेत नर्सरी ते इयत्ता ९ वी व इयत्ता ११ वी च्या विद्यार्थ्यांना एक केशर आंब्याचे झाड मोफत देण्यात आले. विद्यार्थ्यांनी या रोपांचे संगोपन करून पर्यावरण संवर्धनात आपला सहभाग नोंदवावा, हा या उपक्रमामागील प्रमुख उद्देश आहे. वृक्षसंवर्धन स्पर्धेसाठी विद्यार्थ्यांचे तीन गट करण्यात आले आहेत. गट १ – नर्सरी ते इयत्ता १ ली

गट २ – इयत्ता २ री ते ५ वी

गट ३ – इयत्ता ६ वी ते ९ वी व ११ वी *स्पर्धेचा कालावधी 30 सप्टेंबर 2026 ते 30 सप्टेंबर 2027 असा (एक वर्ष) आहे.* प्रत्येक गटातून तीन विजेते स्पर्धक निवडले जाणार असून त्यांना रोख पारितोषिक व चषक देण्यात येणार आहे. तसेच प्रत्येक गटातून चार उत्तेजनार्थ बक्षिसेही देण्यात येणार आहेत.

अजितदादा पवार यांनी पर्यावरण संवर्धन, वृक्षारोपण आणि हरित परिसर निर्मितीला महत्त्व दिले होते. झाडे ही केवळ निसर्गाची शोभा नसून शुद्ध हवा, पाऊस, मातीचे संरक्षण, सावली आणि जैवविविधता यासाठी अत्यंत आवश्यक आहेत असे त्यांचे जनतेला नेहमी सांगणे असायचे. या स्पर्धेच्या माध्यमातून सर्व विद्यार्थी या झाडांचे संवर्धन व संगोपन तर करतीलच परंतु ही झाडे नेहमीच त्यांना मा. अजितदादांची आठवण करून देणार आहेत. जेंव्हा जेंव्हा या झाडांकडे पाहिले जाईल तेव्हा दादा आपल्यातच आहेत असं त्यांना वाटेल अशी मते विद्यार्थ्यांनी व्यक्त केली.

'वृक्षसंवर्धनाचा संकल्प – पर्यावरण रक्षणाचा ध्यास’ या संदेशातून विद्यार्थ्यांनी केवळ रोपे लावण्यापुरते मर्यादित न राहता त्यांचे संगोपन करण्याची जबाबदारी स्वीकारावी, असा संदेश या उपक्रमातून देण्यात आला.

कार्यक्रमाचे सूत्रसंचालन व आभार प्रदर्शन दादा राउत यांनी केले.