प्रतिनिधी Editor Pradnyaruchi Kamble :
सुपे : 🌱 विद्यार्थ्यांनी कौशल्याधारित कार्यशाळेतून साकारलेले गणपती व डेकोरेशन साहित्य शनिवारी होणाऱ्या मार्केट फेअरमध्ये विक्रीसाठी उपलब्ध ! विद्यार्थी घेणार व्यवसायाचे धडे सुपे, प्रतिनिधी - दि.11 सप्टेंबर 2026 : विद्या प्रतिष्ठान सुपे इंग्लिश मिडियम स्कूलमध्ये इयत्ता 5 वी ते 8 वीच्या विद्यार्थ्यांसाठी सोमवार, दि. 31 ऑगस्ट ते 11 सप्टेंबर या कालावधीत तीन टप्प्यांमध्ये कौशल्याधारित कार्यशाळेचे आयोजन करण्यात आले होते. या कार्यशाळेत विद्यार्थ्यांनी उत्स्फूर्त सहभाग घेत इको-फ्रेंडली गणपती बनविण्याचे कौशल्य आत्मसात केले. विद्यार्थ्यांनी शाडूच्या मातीचा वापर करून गणपती बाप्पाच्या विविध मूर्ती स्वतःच्या हाताने तयार केल्या. गणेश मूर्ती तयार करण्याचे प्रात्यक्षिक शिक्षिका निकिता लावंड यांनी विद्यार्थ्यांना दाखविले. मूर्तीला आकर्षक आकार देण्यासाठी पुठ्ठा किंवा लाकडी बेस, टूथपिक, लाकडी काड्या व चमचा यांचा वापर करण्यात आला. तसेच ॲक्रेलिक रंगांच्या साहाय्याने विद्यार्थ्यांनी आपल्या कल्पकतेनुसार गणेशमूर्ती रंगवल्या. गणेश मूर्ती बनविण्याची कार्यशाळा ही तीन टप्प्यांमध्ये पूर्ण करण्यात आली.

या उपक्रमात वनस्पतींच्या बियांचा वापर करण्यात आल्याने पर्यावरणपूरक गणेशमूर्ती तयार करण्याबरोबरच विद्यार्थ्यांना पर्यावरण संवर्धनाचा संदेशही देण्यात आला. कार्यशाळेमुळे विद्यार्थ्यांच्या सर्जनशीलतेला, कलात्मकतेला आणि हस्तकौशल्याला चालना मिळाली.

“कलेतून कौशल्य आणि कौशल्यातून पर्यावरण संवर्धन” या उद्देशाने आयोजित करण्यात आलेली ही कार्यशाळा विद्यार्थ्यांसाठी ज्ञानवर्धक व आनंददायी ठरली असे मत शाळेचे प्राचार्य डॉ. योगेश पाटील यांनी व्यक्त केले.

कार्यशाळेनंतर विद्यार्थ्यांनी या पुढील काळात आम्ही स्वतःच्या घरचे गणपती स्वतःच्या हातांनी पर्यावरण पूरक पद्धतीने बनवू अशी प्रतिज्ञा घेतली आणि यातून आम्ही पर्यावरण संवर्धन करू अशी ग्वाही दिली. विद्यार्थ्यांनी स्वतः तयार केलेले गणपती व डेकोरेशनचे साहित्य शनिवारी शाळेत होणाऱ्या मार्केट फेअर मध्ये विक्रीसाठी उपलब्ध करून देण्यात येणार आहे यातूनच विद्यार्थ्यांना व्यवसाय करण्याचे व उद्योजकतेचे धडे दिले जाणार आहेत . विद्यार्थ्यांनी बनविलेले गणपती व डेकोरेशन साहित्य पालकांनी जास्तीत जास्त प्रमाणात खरेदी करावे असे आवाहन शाळेने व शिक्षकांनी केलेले आहे .