प्रतिनिधी Editor Pradnyaruchi Kamble :
सुपे : सुपे, शनिवार, दि. ५ सप्टेंबर २०२६ शिक्षक दिनानिमित्त विद्या प्रतिष्ठान सुपे इंग्लिश मिडीयम स्कूलचे प्राचार्य डॉ. योगेश पाटील यांच्या समवेत सर्व स्टाफने जगप्रसिद्ध जालिंदरनगर येथील वारे गुरुजींच्या शाळेला शैक्षणिक भेट दिली. या भेटीचा मुख्य उद्देश शिक्षणातील नावीन्यपूर्ण उपक्रम, विद्यार्थीकेंद्री दृष्टिकोन आणि प्रभावी अध्यापन पद्धतींचा अनुभव घेणे हा होता. या भेटीदरम्यान सर्व शिक्षकांनी वारे गुरुजी यांच्याशी शाळेतील विद्यार्थ्यांशी संबंधित विविध शैक्षणिक व सामाजिक विषयांवर सुमारे तीन तास सखोल चर्चा केली. शिक्षण क्षेत्रातील बदल, विद्यार्थ्यांचा सर्वांगीण विकास, अध्यापनातील नावीन्य, शिक्षकांची भूमिका तसेच शाळेच्या गुणवत्तावाढीसाठी आवश्यक असलेल्या विविध बाबींवर वारे गुरुजींनी मोलाचे व अमूलाग्र मार्गदर्शन केले. यानंतर सर्व शिक्षकांनी वारे गुरुजींच्या शाळेची संपूर्ण पाहणी केली. शाळेतील विविध उपक्रम, शैक्षणिक वातावरण आणि विद्यार्थ्यांच्या सहभागाची माहिती घेतली. यावेळी शिक्षकांनी विद्यार्थ्यांशी संवाद साधून त्यांच्या अनुभवांनाही जाणून घेतले.

शिक्षक दिनाची ही शैक्षणिक सहल सर्व शिक्षकांसाठी प्रेरणादायी आणि ज्ञानवर्धक ठरली. वारे गुरुजींच्या विचारांतून व कार्यपद्धतीतून शिक्षणाकडे पाहण्याचा नवा दृष्टिकोन शिक्षकांना मिळाला असल्याचे मत शिक्षकांनी व्यक्त केले.

शिक्षक दिनाच्या निमित्ताने झालेली ही शैक्षणिक भेट शिक्षकांच्या व्यावसायिक विकासासाठी तसेच शाळेच्या शैक्षणिक वाटचालीसाठी निश्चितच दिशादर्शक ठरेल असे मत प्राचार्य योगेश पाटील यांनी व्यक्त केले.