प्रतिनिधी Editor Pradnyaruchi Kamble :
सुपे : सुपे (विद्यार्थी प्रतिनिधी): विद्या प्रतिष्ठान सुपे इंग्लिश मीडियम स्कूलच्या विद्यार्थी व शिक्षकांनी एकत्रित येत सकारात्मक शैक्षणिक बातम्या समाजात पोहोचण्यासाठी ई डिजिटल वर्तमानपत्र सुरू केले आहे .या डिजिटल वर्तमानपत्राचे उद्घाटन आज पुणे जिल्हा परिषदेचे उपशिक्षणाधिकारी श्री महेश पवार यांच्या हस्ते उद्घाटन करण्यात आले . डिजिटल वर्तमानपत्राच्या माध्यमातून विविध शैक्षणिक बातम्या प्रसिद्ध होणार आहेत. विद्यार्थ्यांमध्ये सामाजिक जाणीव, सजगता आणि वृत्त संकलनाचे कौशल्य निर्माण व्हावे या उद्देशाने विद्या प्रतिष्ठान संचलित सुपे इंग्लिश मीडियम स्कूलमध्ये विद्यार्थ्यांसाठी 'लोकशाहीचा चौथा स्तंभ: वृत्तपत्र व पत्रकारिता' या विशेष उपक्रमांतर्गत सदरचे वर्तमानपत्र सुरू करण्यात आले आहे . विद्यार्थ्यांनी उत्स्फूर्त सहभाग घेत पत्रकारितेचे प्राथमिक धडे गिरण्यास सुरुवात केली आहे .

विद्यार्थ्यांना लोकशाही व्यवस्थेमध्ये वृत्तपत्रांची आणि प्रसारमाध्यमांची असलेली महत्त्वाची भूमिका, बातमीचे स्वरूप, माहितीचे संकलन, वस्तुनिष्ठ लेखन, मुलाखत घेण्याची कला आणि संपादकीय प्रक्रिया याविषयी ज्ञान प्राप्त होण्यासाठी या वर्तमानपत्राचा उपयोग होईल असे मत उपशिक्षणाधिकारी श्री महेश पवार यांनी व्यक्त केले .

कार्यक्रमप्रसंगी बोलताना शाळेचे मुख्याध्यापक डॉ. योगेश पाटील यांनी सांगितले की, "लोकशाही बळकट ठेवण्यात माध्यमांची भूमिका अत्यंत मोलाची आहे. शालेय वयातच जर विद्यार्थ्यांना वृत्तपत्र वाचनाची सवय लागल्यास त्यांच्यातील विश्लेषणात्मक विचार, संवाद कौशल्य आणि सामाजिक उत्तरदायित्वाची भावना विकसित होईल या उद्देशाने सदरचे डिजिटल वर्तमानपत्र सुरू केले आहे . विद्यार्थ्यांनी स्वतः प्रत्यक्ष बातमी लेखन, शालेय घडामोडींचे वार्तांकन आणि वर्गस्तरावरील हस्तलिखित वृत्तपत्र तयार करण्याचे प्रात्यक्षिकही केले आहे . सदर उपक्रमामुळे विद्यार्थ्यांमध्ये वाचन आणि लेखनाची आवड निर्माण होण्यास मदत होणार असून भविष्यातील सजग नागरिक घडवण्याच्या दृष्टीने हे वर्तमानपत्र व संबंधीत कौशल्य अत्यंत उपयुक्त ठरणार असल्याचे शिक्षकांनी नमूद केले. सदर ई वृत्तपत्र सुरू करण्यासाठी शाळेचे शिक्षक श्री संतोष बनकर व सौ प्रज्ञारुची कांबळे यांनी विशेष प्रयत्न केले.